ILOILO CITY – Nabaton na ni Iloilo City Mayor Jerry Treñas ang Audit Observation Memorandum gikan sa Commission on Audit tuhoy sa pagbakal sang Iloilo City Government sang motor vehicles umpisa sang Enero 1 tubtub Hunyo 30, 2019.
Sa interview sang Bombo Radyo kay Treñas, iya ginpahayag nga ang purchase order sang walo ka multi-pupose vehicles nga gin-audit sang Commission on Audit ang natuon pa sa termino ni anay Iloilo City Mayor Jose Espinosa III.
Suno kay Treñas, nagaguwa nga ang walo ka mga salakyan nga nagabalor sang P10.53 million ang wala sang pahanugot gikan sa Secretary of Interior and Local Government santo sa Administrative Order nga ginasunod sang Commission on Audit.
Santo sa Audit Observation Memorandum, nakasaad nga makaduluda ang validity sang purchase order kag ang pagbayad.
Ginpahayag ni Treñas nga ang purchase order sang walo ka salakyan ang mas nauna pa sa purchse order nga iya ginpakansela bangud sa ginapahayag overpricing ukon tuman ka mahal.
Mas makapaayo suno sa alkalde nga maghatag sang sabat ang mga nagabug-os sa Espinosa administration agud nga maathagan ang tanan tuhoy sa purchase order sang walo ka multi-pupose vehicles.
