ILOILO CITY – Pagahatagan sang 72 ka oras agud nga makapaathag ang siyam ka commercial establishment nga naglapas sa Executive Order 46 ukon General Bar Guidelines kadungan sang pagdula sang Liquor Ban sa syudad sang Iloilo.
Sa interview sang Bombo Radyo kay Mr. Norman Tabud, pinuno sang Business Permit and Licensing Office, iya ginpahayag nga bisan One Strike Policy ang ginapatuman apang indi man mahimo nga ipasirado gilayon ang mga commercial establishment nga naglapas sa pagsulundan.
Suno kay Tabud, kinahanglan nga mag-agi sa due process ang pagbawi sang business permit.
Ginpahayag ni Tabud nga mahimo nga sa subong ukon sa masunod pa nga adlaw mahatag ang memorandum sa diin pagabasehan naman sa pagdesisyon ni Iloilo City Mayor Jerry Treñas ang kaundan sang mangin sabat sang tagdumalahan sang siyam ka commercial establishment.
Lakip sa mga commercial establishment nga nakitaan sang kapaltahan sang composite team amo ang mga masunod : Angel A Bar, Juan’s Martha Food Corp., Project X, Sinukad Seafood Restaurant, Bull and Barel, HQ Beercade, Floyd’s Famous BBQ, Paraiso Night Club kag Camp Jefferson Disco Pub.
Kalabanan ang naglapas sa Anti-Smoking Ordinance, pagserbe sang makahulubog nga ilimnon sa mga menor de edad, wala sang functional nga Closed Circuit Television Camera, wala sang security personnel kag wala nagapatigayon sang body frisking sa mga nagasulod nga customer.
