ILOILO CITY – Ginbuyagyag ni Iloilo City Mayor Jerry Treñas ang mga ginapahayag anomaliya ni anay Iloilo City Mayor Jose Espinosa III.
Ginpahayag ni Treñas sa atubang sang mga empleyado sang Iloilo City Hall nga nagbiya lang sa pwesto si Espinosa nga wala mahitso ang mga anomaliya nga iya nahimo.
Lakip sa mga gintumod ni Treñas amo ang pagbakal sang Espinosa administration sang mga salakyan nga tuman ka mahal kag sa pagkamatuod, may yara na sang Audit Observation Report ang Commission on Audit.
Nagakahulugan suno kay Treñas nga may yara sang descripancy sa pag audit sang Iloilo City Government tuhoy sa nasambit nga procurement.
Magluwas diri, natukiban man suno sa alkalde nga wala ginpaagi sa Department of Budget and Management ang pagbakal sang salakyan.
Nakitaan man sang anomaliya ni Treñas ang pagbakal sang mga computer set.
Ginpahayag sang alkalde nga siya ang makaluloy bangud siya ang ginasukot sang Commission on Audit.
Samtang, ginkadismaya man ni Treñas ang paggamit sang anay alkalde sa mga regular employee sang Iloilo City Goverment para sa pamulitika.
Suno kay Treñas, ang makapamatuod sa nasambit nga akusasyon amo nga may yara na sang tatlo ka empleyado nga nagapangatubang sang electioneering.
Nagdugang man sa listahan sang mga ginreklamo amo si Mr. Melvin Sorongon nga na-assign sadto sa Public Safety and Transportation Management Office.
