ILOILO– Mapagwa sang direktiba si Province of Iloilo Governor Arthur “toto” Defensor Jr., nga mas striktuhan ang oras sang pag ubra sang mga empleyado sa kapitolyo kag sa iban pa nga mga talatapan sang gobyerno sa probinsya.
Sa interview sang Bombo Radyo kay Governor Arthur ‘Toto” Defensor Jr., iya ginpahayag nga ang nasambit nga direktiba ang ila mangin aksyon agud mas mapaayo ang serbisyo sang ila mga empleyado.
Ini may kaangtanan sa ginpatigayon nga on the spot inspection sang Civil Service Commission sa Iloilo Provincial Capitol nga ginpangunahan ni Commissioner Aileen Lourdes Lizada.
Kun sa diin natukiban nga magluwas sa wala sang on duty personnel, nakita man nga nakabukas ang browser sang isa ka online shopping website sa computer.
Suno sa gobernador, nag serbi man nga pamukaw para sa ila ang ginpatigayon nga on the spot inspection agud mas mahatagan nila sang atensyon ang pagkay-o kag pagpasangkad sang ginahatag nga serbisyo sang mga empleyado sa Iloilo Provincial Capitol.
