ILOILO– Ginaduso sang probinsya sang Iloilo ang hugot nga pagbantay sa mga nagasulod nga supply sang baboy kag karne sa Western Visayas.
Ini may kaangtanan sa African Swine Fever outbreak sa Luzon sa diin madamo sang baboy ang nagkalamatay.
Sa interview sang Bombo Radyo kay Governor Arthur ‘Toto’ Defensor Jr., iya ginpahayag nga ginahulat na lang ang iya nga pirma agud mapaguwa na ang executive order nga magadumili sa pagbaton sang supply sang baboy, karne kag processed meat products gikan sa mga lugar nga may yara sang African Swine Fever Outbreak.
Suno kay Defensor, hugot man ang ginapatigayon nga quarantine regulations sa mga pantalan nga posible agyan sang mga gina-transport nga baboy.
Ginpahayag man sang natungdan nga mahimo lang tugutan ang pag-transport sang baboy kun ini ang kompleto sa mga dokumento kag permit nga ginahingyo sang Bureau of Animal Industry.
Ginpasigurado man sang gobernador nga wala sang dapat kabalak-an ang mga pumuluyo bangud bastante ang supply sang baboy sa Iloilo apisar sang ginpaguwa nga ban sang Bureau of Animal Industry.
