ILOILO – Ginpanginwala ni Ililo 3rd District Congressman Lorenz Defensor ang akusasyon ni Sen Ping Lacson may kaangatanan sa ginapahayag kwarta nga mabaton sang 22 ka mga House Deputy Speakers kag kada kongresista nagikan sa 2020 budget.
Sa interview sang Bombo Radyo kay Congressman Lorenz Defensor, iya ginpahayag nga wala sang kamatuoran ang mga akusasyon ni Lacson bangud ang P1.5 bilyon nga gina tudlo sang Senador amo ang dugang nga pondo nga gin request sang House of the Representative para sa kabilugan nga operasyon sang kongreso sa 2020.
Suno kay Defensor, wala man sila sang kahilabtanan sa P700 milyon na nakatalana para sa kada kongresista nga para sa ila nga distrito bangud katungdanan lang nila ang mag rekomenda sang pondo para sa kada departamento sa ila nga distrito.
Dugang sang natungdan, ang 2020 budget ang pinaka una nga budget proposed nga pinakamadasig nga na aprobahan.
Madumduman nga gin aprobahan sang House of the Representative ang proposed 2020 national budget kag ang indibidwal kag institutional nga amendment sang mga kongresista sa budget bill sang gintalikdan nga semana.
Samtang naghatag naman sang suhestyon ang kongresista nga pataasan ang pondo sang Department of Agriculture sa dasun nga tuig bangud nagapati sya nga isa ini sa pinaka importante nga departamento sang gobyerno.
