ILOILO CITY – Ginatugyan na lang ni Iloilo City Mayor Jerry Treñas sa City Health Office ang pagpatigayon sang fogging sa syudad sang Iloilo.
Ini ang kasunod sang tatlo ka casualty sa diin ang ginatudlo nga rason sang kamatayon sang mga biktima amo ang fogging nga para kun tani sa pagtapna sang Dengue Hemorrhagic Fever.
Sa interview sang Bombo Radyo kay Treñas, iya ginpahayag nga ginadumili-an niya ang pagpatigayon sang fogging magluwas lang kung ang City Health Office ang magapatigayon sini.
Suno kay Treñas, ang mga empleyado nga yara sa City Health Office ang may yara sang nagakaigo nga ihibalo sa pagpatigayon sang fogging.
Ginpahayag ni Treñas nga wala naman niya ginpa-imbestigaran ang natabo bangud nga indi man makumpirma nga fogging gid man ang mayor nga rason sang kamatayon sang mga biktima.
Nahibalu-an nga duha ang patay sa Brgy. San Pedro sa distrito sang Molo sa diin ang grupo ni Iloilo City Councilor Alan Zaldivar ang ginapahayag nagpatigayon sang fogging samtang isa naman ang patay sa Brgy. Baldoza sa distrito sang La Paz sa diin ang grupo ni Iloilo City Vice Mayor Jeffrey Ganzon ang ginapahayag nagpatigayon sang fogging.
Wala pa sang sabat sanday Zaldivar kag Ganzon tuhoy sa isyu.
