ILOILO – Ginbisita sang Public Private Partnership Center sa idalom sang National Economic and Development Authority kaupod ang Consultant for Engineering Design kag Local Economic Enterprise Office ang Iloilo Terminal Market kag Iloilo Central Market agud tsekyaron ang mga nagakadapat nga kay-uhon kag bag-uhon sa mga nasambit nga merkado.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office iya ginpahayag nga isa man sa katuyuan sang site visit amo ang mapamatian kag malab-ot ang mga sentimento sang mga vendors natuhoy sa pagrenovate sang merkado.
Suno kay Castañeda, prioridad nila nga pamatian ang mga sentimento kag suhestiyon sang mga vendors kag unahon ang ila nga mga kinahanglan.
Dugang sang natungdan, sa pagbisita sang PPP team madamo sila sang nakita nga nagadakapat bag-uhon sa gwa kag sa sulod sang merkado.
Ginklaro man ni Castañeda nga sa tion nga ma umpisahan na ang konstruksyon sang merkado wala sang ma displaced kag ma apektuhan nga mga vendors.
Sa pihak sini, suno kay Castañeda nangin madinalag-on ang nasambit nga on site visit kag na apresyar nila ang mga ginhatag nga suhestiyon lakip man ang mga sentimento nga ginpakigbahin sang mga vendors.
