ILOILO CITY – Hugot nga seguridad ang ipatuman sang Iloilo City Police Office sa pag-umpisa buwas nga adlaw sang University Games 2019 nga hiwaton sa syudad sang Iloilo.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga may yara sang 140 ka personnel nga magatutok sa seguridad sang kapin sa 3,000 ka atleta nga magapakigbahin sa University Games.
Suno kay Defensor, magluwas sa seguridad sang mga atleta, pagatutukan man nila ang dalagan sang trapiko sa palibot sang syudad ilabi na ang malapit sa venue sang sporting event.
Ginpahayag ni Defensor nga magluwas sa Iloilo City Police Office, may yara man sang private security ang mga atleta nga magabulig sa pagbantay.
Ginpasiguro man sang natungdan nga mangin matalunsay ang paghiwat sang University Games sa syudad sang Iloilo sa diin ang University of San agustin ang magaserbe nga host.
