ILOILO CITY – Nangin tayuyon ang pagpatigayon sang mga hampang sa una nga adlaw sang 24th University Games sa University of San Agustin sa syudad sang Iloilo.
Sa interview sang Bombo Radyo kay Rev. Father Wilson Capellan, OSA, Chairman sang Media and Publicity Committee, iya ginpahayag nga wala pa sang report sang anu man nga aksidente nga nagluntad sa tagsa ka mga hampang.
Suno kay Capellan, kun ano man ang makita nga sala sa venue, paghampang kag iban pa sa subong nga adlaw, ang pat-ud nga indi na ini masulit tubtob matapos ang University Games.
Dugang ni Capellan, may yara man sang nagastand-by nga medical team sa tagsa ka venue agud maghatag sang bulig sa tion sang emerhensya.
Samtang, nagapasalamat man ang mga delegado bangud sa maayo nga tiyempo kadungan sang masandukot nga hampang sa imbukada nga adlaw sang University Games.
Sa interview sang Bombo Radyo kay Fray Stephen Tan, Over-all Chairman sang Steering Committee, iya ginpahayag nga simultaneous ang sport events kag indi mabudlay ang pagpatigayon sini.
Nahibaluan nga gin-umpisahan na ang Athletics sa Iloilo Sports Complex, Basketball sa University of San Agustin Gym kag Iloilo Sports Complex, Volleyball sa University of San Agustin Gym, Football sa Iloilo Sports Complex kag University of San Agustin kag Beach Volleyball sa Breakthrough Beach sa distrito sang Arevalo.
