ILOILO – Padayon ang pagpangita sa mga Ilongga Beauty nga interesado nga magpasakop sa Miss Iloilo 2020.
Katuyuan sang nasambit nga beauty pageant ang magpangita sang mga Ilongga nga may matahum nga tagipusuon kag sarang magtiglawas sa Iloilo sa prestihiyoso nga mga beauty pageants sa pungsod kag sa luwas sang pungsod kag indi lang matahum kundi may yara sang maayo nga batasan, kag may adbokasiya.
Pila sa mga requirements amo nga dapat naturally born, single nga babayi nga may dugo nga Ilongga, nagataas sang 5’6″, kag nagaedad sang 17- 25 anyos.
Sa interview sang Bombo Radyo kay Rhea Peñaflorida, miyembro sang Miss Iloilo 2020 core group iya ginpahayag nga dako nga oportunidad para sa mga Ilongga nga magapasakop sa nasambit nga beauty pageant indi lang bangud sa dalagko nga mga premyo nga posible nila makuha bangud man madamo sila sang matun-an nga leksyon kag ini ang maga serbe nga training grounds para sa mga naga handom nga mangin beauty queen.
Nahibaluan nga ang magadaog nga Miss Iloilo 2020 ang magatiglawas sa Iloilo sa Binibining Pilipinas 2020; Miss Iloilo Dinagyang 2020 nga magapasakop sa Miss Aliwan 2020; Miss Iloilo World nga ipadala sa Miss Philippines World 2020.
Nagahulat man sa mga title holders ang dalagko nga mga papremyo kun sa diin magabaton sila sang P60,000 kada isa kag international tour package samtang may kilalahon man nga first runner-up nga magabaton sang P20,000 kag second runner- up nga magabaton sang P15,000.
Ang deadline sang pagpasa sang application ang tubtob nalang sa Oktubre 31, pagahiwaton naman ang final screening sa Nobyembre 9 samtang sa Enero 23, 2019 naman ang Coronation Night.
