ILOILO CITY- Nabalaka ang mga jeepney drivers kasunod sang pagsugod na sa pagbyahe sang mga modernized jeepney sa Syudad sang Iloilo.
Sa interview sang Bombo Radyo kay Anthony Diaz, driver sang Jaro CPU- Ungka nga jeep, iya ginpahayag nga ginakahangaw-an niya nga magnubo ang ila kita bangud mas pilion sang publiko nga magsakay sa modernized jeepney bangud mas komportable.
Suno kay Diaz, mas dako man ang espasyo sa modernized jeepney kag mas madamo ang passenger capacity sa diin mahimo magtindog ang iban nga pasahero.
Samtang suno naman sa driver sang modernized jeepney nga si alyas Boy, gamay pa lang nga mga pasahero ang nagasakay sa moderno nga jeep.
Suno sa iya,sa subong,sa pagkamatuod, mas dako ang income sang nagabyahe pa lang siya sang jeep.
Nagalaum naman ini nga kun maanad na ang mga pasahero sa pagsakay sa modernized jeepney, dako man ang ila kitaon sa ulihi.
