ILOILO CITY – Ginakasubo sang Department of Education (DepEd) ang pagkilala sa Pilipinas bilang ‘lowest reading comprehension country’ ukon may pinakadamo nga mga estudyante nga indi makahibalo magbasa.
Ini ang base sa nag-gwa nga resulta sa 2018 Programme for International Student Assessment (PISA), isa ka worldwide study nga ginpatigayon sang Organization for Economic Cooperation and Development (OECD).
Ang resulta ang gin-release sang Martes, Disyembre 3.
Sa interview sang Bombo Radyo kay Dr. Lilibeth Estoque, assistant schools division superintendent sang Division of Iloilo, iya ginpahayag nga isa na ini ka ‘eye-opener’ nga dapat tutukan sang maayo sang mga eskwelahan ang pagtudlo sa mga kabataan kun paano magbasa.
Suno kay Estoque, lakip sa ila ginahimo nga tikang agud masolbar ang nasambit nga problema amo ang ‘capacity building activity’ kag nagkalain-lain nga reading programs kag pagtutok sa beginning reading.
Lakip naman sa ginatudlo rason kung ngaa indi makahibalo magbasa ang mga kabataan amo ang masami nga pag-absent kag indi paghatag sang focus sa pagbasa.
Nahibaluan nga santu sa amo nga assessment, 600,000 ka mga 15-year-old students sa 79 ka mga pungsod sa bug-os nga kalibutan ang nagpasakop.
Base sa resulta, ang Pilipinas ang nag-angkon sang average nga 340 — pinakanubo ipaanggid sa 78 pa ka mga pungsod, kag 147 points nga mas manubo sa OECD average nga 487.
Ang Pilipinas ang ikaduha man sa pinakanubo sa Science nga may 357 nga score kag mathematics nga may 353 nga score.
Ang mga syudad naman sa China nga ginalakipan sang Beijing, Shanghai, Jiangsu kag Zheijang ang nagpangibabaw sa tanan nga categories.
Ini man ang una nga kahigayunan nga nagpasakop ang Pilipinas sa amo nga assessment.
