ILOILO CITY – Ginapatalang sang More Electric Power Corporation (MORE) ang publiko kaangot sa ginpaguwa nga Temporary Restraining Order (TRO) sang Korte Suprema batuk sa una nga desisyon sang Mandaluyong Regional Trial Court (RTC).
Ini ang pahayag sang Panay Electric Power Company (PECO).
Sa interview sang Bombo Radyo kay Atty. Estrella Elamparo, legal counsel sang PECO, iya ginpahayag nga gina-mislead sang MORE ang syudad sang Iloilo bangud daw kaangay nga ginapahayag sang amo nga power company nga mahimo na padayunon ang expropriation case bangud may yara na sila sang TRO.
Suno kay Elamparo, ang TRO ang nagakahulugan nga ‘ginpunggan‘ lang ang implementasyon sang una nga mandu sang Mandaluyong RTC, apang indi buot silingon nga ‘ginpauntat‘ na ini.
Kaangot diri, ginpahayag sang natungdan nga wala sang epekto ang amo nga TRO sa expropriation case nga yara subong sa Branch 35 sang Iloilo RTC.
Suspendido gihapon ang expropriation proceedings suno kay Elamparo.
Nahibaluan nga Disyembre 3, Martes, sang ginamanduan sang Korte Suprema ang Branch 209 sang Mandaluyong RTC kag PECO sa pag-‘cease and desist’ sang implementasyon sang nauna na nga desisyon sang korte.
