ILOILO – Tinguhaan ni Iloilo 4th District Board Member Rolly Distura nga mahingagaw diskusyon sa Sangguniang Panlalawigan ang paghatag sang Service Recognition Incentive sa mga empleyado sang gobyerno.
Ang Service Recognition Incentive ukon ang Administrative Order (AO) 19 nga ginpapanaug ni Presidente Rodrigo Duterte ang nagamandu nga maghatag sang indi magsobra P10,000 sa kada empleyado sang gobyerno sa fiscal year 2019.
Sa interview sang Bombo Radyo kay Distura, iya ginpahayag nga sa tion nga indi ini mahingagaw sa subong nga adlaw, iya hingyuon sa iya mga kaupod sa Sangguniang Panlalawigan nga magpatigayon sang isa pa ka session subong nga tuig agud maistoryahan ang amo nga administrative order.
Ini bangud subong nga adlaw, Disyembre 10, ang katapusan nga session sa 2019.
Positibo si Distura nga suportahan sang iya mga kaupod sa Sangguniang Panlalawigan ang iya hingyo bangud para ini sa interes sang mga uniformed personnel sang gobyerno.
Suno kay Distura, sa kondisyon nga may yara lang sang pondo, nagapati siya nga matigayon ang amo nga order.
Kun matabo suno sa natungdan, ini ang igalakip sa supplemental budget sang probinsya.
