ILOILO CITY – Naga-antos ang pila ka mga delegado sang Iloilo Schools Sports Council (ISSC) Meet 2019 bangud sa indi maayo nga mga billeting areas.
Sa interview sang Bombo Radyo kay Mr. Jonald Paclibar, manunudlo sa Assumption School of Passi City, iya ginpahayag nga sang nag-abot sila sa Iloilo National High School nga amo ang ila billeting area, nakibot sila bangud mahigko ang lugar kag wala pa nahimos.
Suno kay Paclibar, sila pa ang nagpagwa sang mga bangko sa classroom kag naglimpyo.
Magluwas sini, wala man sang unay nga comfort room ang ila hulot kag kinahanglan pa nila nga magpangita sang banyo sa iban nga hulot.
Tuman man ka kulang ang supply sang tubig sa diin kinahanglan pa nila nga magsag-ob kag maghulat sa pagtubod sang gripo.
Dugang pa, wala man sang ginpahamtang nga temporaryo nga kusina agud malutuan sang mga delegado.
Sa pihak sini, ginpasalig sang natungdan nga indi ini mangin upang agud mangin madinalag-on sa hinampang.
Nahibaluan nga indi ini ang una nga bes nga may nagreklamo sa billeting area.
Sa una nga interview sang Bombo Radyo kay Mr. Leo Dipositario, Asst. Coach sang Volleyball Team – Seconday Men halin sa banwa sang Dumangas, iya ginpahayag nga isa sa nangin hangkat sa ila athletes subong nga tuig amo ang pwesto nila sa ikaapat nga panalgan sang Iloilo National High School.
Mahapo suno kay Dipositario ang magsaka kag magpanaug.
Dugang pa sang natungdan, may yara man sang kakulangan sa tubig bangud madamo ang nagagamit.
Apang paathag ni Dipositario, ini tanan ang ila naintindihan bangud kabahin ini sang kabuhi sang coach kag atleta.
Indi man ini ang una nga kahigayunan suno kay Dipositario nga nagtinir sila sa billeting schools amo nga nangin responsable naman ang ila mga delegado.
