ILOILO CITY – Ipatawag para sa isa ka pagsinapol ang mga opisyal sang 1st kag 4th Congressional District Sports Association (CDSA) kaupod ang mga opisyal sa hampang nga baseball-elementary sa nagapadayon nga Iloilo Schools Sports Council Meet 2019.
Ini agud makakita sang win-win solution sa tunga sang indi pag-intindihanay nga nagluntad sa duha ka kampo nga ginatiglawas sang eskwelahan nagikan sa Igbaras kag Anilao.
Sa interview sang Bombo Radyo kay Nick Valenzuela, Schools Division of Iloilo sports officer, iya ginpahayag nga ginalikawan nila nga maapektuhan ang mga kabataan sa ‘away’ sang duha ka koponan.
Suno kay Valenzuela, wala natapos ang hampang nga baseball kahapon bangud sa protesta sang coach nga nagikan sa Anilao.
Sang aga suno kay Valenzuela, may yara sang protest letter nga ginhatag batok sa tournament manager sang baseball.
Indi matumod ni Valenzuela kun ano gid ang reklamo sang team sang Anilao batok sa tournament manager ilabi na bangud wala man ini ‘direkta nga naga-officiate sa hampang.’
Bangud sa protesta, temporaryo nga gin-untat ang hampang apang may yara sang ginpirmahan ang duha ka team nga ipadayon ang hampang sa hapon.
Ginpahayag sang natungdan nga masunod sini, sang hapon, sang buot na nga ipadayon ang nautod nga hampang, liwat nga ginpahayag sang Anilao team nga islan ang officiating body.
Indi mahatag sang management ang amo nga hingyo bangud suno kay Valenzuela, lain ang naga-officiate sa elementary, kag lain man sa secondary.
Sang ulihi, natukiban nga ginareklamo sang Anilao coach nga si Edgardo Bandada ang mga opisyal bangud ang scorer ang ginapahayag nga nagikan sa first congressional district.
Bias suno kay Bandada bangud halin ini sa distrito nga gingikanan mismo sang ila kasumpong.
Bangud sini, suno kay Valenzuela, wala sang desisyon kon sin-o ang nagdaug sa duha ka koponan bangud patas ang ila nga score sa apat ka innings.
Nahibaluan nga ini na ang ikaduha nga reklamo sa hampang nga ginhimo sang banwa sang Anilao bangud una nga nag-walk out ang mga atleta sang Anilao National High School batok sa Barotac Viejo National High School sa hampang nga baseball-secondary.
