ILOILO – Ginapaandaman ang mga chiefs of police kag commanders nga sila ang awtomatiko nga i-relieve nagikan sa pwesto sa tion nga indi masolbar sa sulod sang 24 oras ang kaso sang stray bullets sa ila tagsa ka area of responsibility nga magatuga sang injury kag kamatayon.
Ini ang paagi sa memorandum nga ginpapanaug nagikan sa Philippine National Police (PNP) national headquarters.
Sa interview sang Bombo Radyo kay Pol. Lt. Col. Joem Malong, tagpamaba sang Police Regional Office (PRO) VI, iya ginpahayag nga naga-limit lamang ang memorandum sa mga kaso sang stray-bullet-related incidents nga matabo sa Christmas’ kag New Year’s eve kag kung may yara sang masamaran kag mapatay nga tawo.
Gin-athag ni Malong nga may yara sang duha ka panuntunan ang kapulisan kaangot sa status sang kaso: ang solved cases kag cleared cases.
Ang ‘solved’ ang nagapatuhoy sa mga kaso sa diin napasakaan na sang kaso kag arestado ang suspetsado, samtang ang cleared naman ang nagapatuhoy nga may ‘persons of interest’ na, ukon nakasuhan na ang suspetsado apang at large pa sa gihapon.
Sa nasambit nga memorandum, dugang ni Malong, wala partikular nga natumod kun bala kinahanglanon gid nga solved.
Ginalantaw sang PRO 6 nga sa December 25 kag January 1, sa tion nga wala sang opisina ang mga korte kag indi maka-file sang kaso ang mga kapulisan, iga-consider nga cleared ang kaso apang kinahanglan nga arestado ang nagpalupok kag mangin subject na lang ini sa ‘filing of case’.
Gin-athag man sang natungdan nga wala pa sila sang supplemental directive, apang ginpasalig ni Malong nga nakahanda na ang bilog nga PRO6 para sa deployment subong nga yuletide season.
Nahibaluan nga sang nagligad nga semana, naka sugod na sila sang deployment sang personnel.
