ILOILO CITY – Aprubado na sang Bureau of Fire Protection (BFP) ang tanan nga mga requirements sang mga accredited nga mga fireworks kag firecrackers sellers sa syudad sang Iloilo.
Ini ang may kaangtanan sa tuigan nga tradisyon sang pagpalupok sa pagsug-alaw sa bag-ong tuig.
Sa interview sang Bombo Radyo kay SFO4 Aquilino Sampiano, pinuno sang Operations Division sang Bureau of Fire Protection Iloilo City, iya ginpahayag nga nagdangat sa 72 tanan ka mga manugbaligya ang ila gin-aprubahan nga magbaligya sa tatlo ka mga distrito sa syudad.
Ini ang ginalakipan sang Buhang, Jaro nga may ara sang 24 ka mga accredited sellers, Jocson St., Arevalo, may ara sang 46 ka mga accredited sellers, kag City Proper nga may ara sang duha ka accredited sellers.
Kaangot sa mga lugar sa syudad kun diin ginapahanugutan ang pagpalupok, ginpahayag ni Sampiano nga kaangay sa mga nagligad nga tuig, mahimo nga mapatigayon ini sa mga public plaza sa syudad.
May yara man sang mga firetrucks nga naka-stand by sa mga plaza agud magresponde sa tion sang emerhensya.
Nahibaluan nga santu sa una nga interview sang Bombo Radyo kay Sampiano, iya ginpalab-ot nga may pila ka mga fire crackers nga gina-pahanugutan kag gina-dumilian.
Lakip sa ginapahanugutan amo ang mga masunod: baby rocket, bawang, gamay nga triangle, pulling of strings, paper caps, El diablo, judah’s belt, kag kwitis.
Sa fireworks, ginapahanugutan ang: sparklers, luces, fountain, jumbo regular kag special, mabuhay, roman candle, trompillo, air wolf, whistle device, kag butterfly.
Samtang, gina-dumili-an naman ang mga palupok nga: watusi, piccolo, mother rockets, pillbox, boga, dako nga Judah’s belt, big bawang, kwiton, good bye philippines, atomic bomb, five star, pla-pla, Og, giant whistle bomb, super lolo, atomic big triangulo, lolo thunder, kabasi kag ang wala sang label nga mga palupok.
