ILOILO CITY- Magadihon sang ordinansa ang Iloilo City Council nga maga-regulate sa mga talipapa sa mga barangay sa syudad sang Iloilo.
Sa interview sang Bombo Radyo kay Iloilo City Councilor Ely Estante, chairman sang committee on Market and Slaughterhouse sa konseho, iya ginpahayag nga tion na agud istriktuhan ang operasyon sang mga talipapa sa syudad.
Suno kay Estante, pinaagi sa isa ka ordinansa, iplastar kun paano padalaganon kag dumalahon ang mga talipapa.
Ginpahayag sang konsehal nga kinahanglan nga mangin standardized ang operasyon sang mga talipapa kag sang mga produkto nga ginabaligya diri ilabi na ang karne.
Dugang pa ni Estante, sa i-propose nga ordinansa, iplastar nga indi mahimo makapatukod sang talipapa ang isa ka barangay kun indi mag-agi sa syudad sang Iloilo.
Matandaan nga nagpatigayon sang pagsinapol ang konseho upod kanday Mr Ariel Castañeda, pinuno sang Local Economic Enterprise Office; Charlie Hofileña, executive assistant for Market and Slaugther House; kag Simplicio Subaldo nga nagadumala sang Iloilo City Slaughter house.
Natalana naman nga ipatawag para sa pagsinapol ang mga officials sang barangay nga may talipapa sa Pebrero 6 agud istoryahan ang masunod nga mga tikang.
