POTOTAN, ILOILO- Isa ang patay kag isa ang kritikal sa bungguanay sang dumptruck kag transit mixer sa Casalsagan, Pototan, Iloilo.
Gindeklarar nga dead on arrival ang biktima nga si Wilfredo Aquino Deliso, legal ang edad, residente sang San Gregorio, Lambunao, Iloilo nga pahinante sang truck nga nag-angkon sang multiple injuries sa lawas.
Nag-angkon naman sang multiple body injury kag bali sa till ang driver sang transit mixer nga si Ronie Tagnong,43, sang Cubay, San Dionisio, Iloilo.
Maswerte naman nga wala napilasan ang driver sang dumptruck nga si Randy Catedrilla,35, sang Poong, Lambunao, Iloilo.
Sa interview sang Bombo Radyo kay Police Staff Sergeant Amando Caporal, imbestigador sang Pototan Municipal Police Station, iya ginpahayag nga halin sa banwa sang Pototan ang dumptruck nga may karga nga balas sa diin nagasunod ini sa isa ka pick up.
Suno kay Caporal, pag-abot sa Casalsagan, Pototan, hinali lang nga nagpondo ang pick-up rason nga naglikaw ang dumptruck apang nasugata sini ang transit mixer.
Bangud sa impact sang head-on collission, nawasak gid ang bumper sang duha ka salakyan sa diin natumba pa ang dumptruck kag nagbunggo naman sa poste ang transit mixer.
