ILOILO-Nagpangabay ang Iloilo Provincial Health office sa publiko nga indi magpanic tuhoy sa novel coronavirus.
Sa interview sang Bombo Radyo kay Dr. Patricia Grace Trabado, chief sang Provincial Health Office, iya ginpahayag nga sa baylo nga magsala, kinahanglan nga mangin vigilante ang publiko.
Suno kay Trabado,ang dapat bantayan sang pumuluyo amo ang mga myembro sang pamilya nga naggikan sa mga pungsod sa diin may yara sang kumpirmado nga kaso sang coronavirus.
Sa tion nga sila ang magpakita sang sintomas sang coronavirus kaangay sang hilanat, pag-ubo,sip-on kag panghatsi, gilayon sila nga dal-on sa health center para matalupangod sang doktor.
May kaangtanan diri, nagpasar naman sang resolusyon si Iloilo Vice Governor Christine Garin nga magamando sa mga ahensya sang gobyerno nga magpatigayon sang information drive batok sa coronavirus.
Ini nga mga ahensya ukon talatapan ang nagalakip sang Provincial health Office, municipal health office kag Department of Education.
Suno kay Garin, ang information drive magatutok sa pagtudlo sa mga tawo sang dapat himuon agud makalikaw sa virus kag sa tion nga matapikan naman, makahibalo sang dapat himuon.
Samtang, gindula sang Department of Health Region 6 ang kahangawa sang publiko tuhoy sa paglapta sang coronavirus sa Region 6.
Sa interview sang Bombo Radyo kay Dr. Mary Jane Juanico, head sang Department of health Region 6 – Infectious Disease Section, iya ginpahayag nga lunsay nagnegatibo ang tatlo ka mga tawo gikan sa China nga nag-abot sa kalibo Interrnational Airport sa aklan nga gin-quarantine matapos nakitaan sang sintomas sang virus.
Suno kay Juanico, magluwas sa tatlo ka mga kaso nga nagnegatibo , wala na sang iban pa nga suspected nga kaso sang novel coronavirus sa rehiyon.
Nahibaluan nga may naglapta nga text message tuhoy sa isa ka guest sa isa ka hotel sa syudad sang Iloilo kag ginpahayag gindala sa isa ka ospital sa syudad apang ini ang ginpanginwala sang nasambit nga hotel kag sang ospital.
