ILOILO CITY- Napahamtang na ang paminsaron sang mga pumuluyo sang Pasong, Igbaras, Iloilo matapos napauntat ang operasyon sang illegal treasure hunting sa ila lugar.
Sa interview sang Bombo Radyo kay Punong Barangay Cornelio Elumba Jr., sang Pasong, Igbaras, Iloilo, iya ginpahayag nga madugay na nila nga luyag pauntaton ang operasyon bangud nabutang sa delikado ang mga pumuluyo sa mahimo pagluntad sang landslide sa lugar bangud sa ginakutkot nga madalom nga buho.
Suno kay Elumba, mabalik na sa normal ang ila sitwasyon kag nadula na ang ila pagkabalaka.
Nagpangabay naman si Elumba sa mga tinawo sang nasambit nga treasure hunting operation nga himuson nila kag i- rehabilitate ang lugar.
Matandaan nga ginmando sang National Museum of the Philippines (NMP) ang grupo sang treasure hunters sa Igbaras, Iloilo nga untaton ang ila aktibidad.
Sa sulat nga ginpadala kay Nony Laquihon Bayogos nga napetsahan Enero 31, 2020, ginmitlang ni National Museum of the Philippines Director General Jeremy Barns nga indi otorisado ang operasyon sa Igbaras bangud ang ginauyatan nga permit ni Bayogos ang gin-isyu para sa treasure hunting sa Sitio Lanod, Barangay Punean, Carangalan, Nueva Ecija.
Suno kay Barnes,ginlapas ni Bayogos ang Republic Act 10066 ukon ang “The National Cultural Heritage Act of 2009,” sa diin nabutang nga ang tanan nga treasure hunting permits kag licenses ang dapat gina-isyu sang National Museum of the Philippines.
