ILOILO CITY-Ginbasol ni anay Department of Health Secretary kag subong 1st district representative Janet Garin ang Department of Health sa sala nga balita tuhoy sa novel Coronavirus nga nangin rason sang pagpanic sang publiko.
Sa interview sang Bombo Radyo Iloilo kay Congresswoman Garin, iya ginpahayag nga napaslawan ang ahensya sa pagpamuno ni Sec. Francisco Duque III nga madul-ong sa publiko ang mga importante nga impormasyon tuhoy sa novel coronavirus scare.
Suno kay Garin,isa sa nangin kakulangan sang ahensiya amo ang indi gilayon nga pagpatigayon sang command conference agud ipahibalo sa publiko ang pinakaulihi nga impormasyon nga ginapagwa sang World Health Organization.
Dugang pa ni Garin, importante man ang pag-appoint sang isa ka speakers bureau nga amo ang magapagwa sa publiko sang mga impormasyon tuhoy sa Novel Coronavirus.
Suno pa kay Garin, wala man gilayo naka -activate sang task force ang Department of Health nga magatutok sa nasambit nga health scare.
Pahayag sang natungdan, ini ang mga rason kun ngaa nagsalangisag ang mga tawo kag nagpanic buying bangud sa pagpati sa naglapta nga mga sala nga impormasyon.
