ILOILO CITY- Liwat nga ginpahanumdom sang director sang Police Regional Office 6 ang “no take policy” sa illegal gambling.
Sa interview sang Bombo Radyo kay Police Brigadier General Rene Pamuspusan, iya ginpahayag nga ini nga pahanumdom sang order ang ginapatuhoy sa mga kapulisan sa bilog nga rehiyon kag ini man ang guidelines ni Philippine National Police Chief Director General Archie Francisco Gamboa.
Suno kay Pamuspusan, kung may yara sang maggamit sang pangalan niya nga ginapagwa nga gin-sugo niya, iya ginapanugyan nga i-report sa iya kag arestuhon sang mga kapulisan.
Nagmando naman siya sa mga provincial kag city directors nga magpatigayon sang full scale operations batok sa illegal gambling.
Sa tion nga may yara sang madakpan nga pulis nga maglapas sang no take policy, magapangatubang ini sang nagakaigo nga kaso kag manabat gid.
Nagpanagawan man ini sa publiko nga kun may nahibaluan nga pulis nag nagalapas sini kag kun nahibaluan nga grupo kag tawo nga involve sa illegal gambling, mag contact lang sa Hotline Number nga 0998-967-3651 ukon mag- message lang sa official facebook page sang Police Regional Office 6.
