ILOILO CITY– Ginaduso sang Land Transportation Franchising and Regulatory Board ang tatlo ka dugang nga ruta padulong sa Iloilo Business Park nga ginduso sang Iloilo City Government pinaagi sa Public Safety and Transportation Management Office.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga ang tatlo ka mga ruta nga gin-abrobahan ang ginalakipan sang SM City-City Proper padulong sa Megaworld, Oton padulong sa Megaworld kag Leganes Highway padulong sa Megaworld.
Suno kay Conlu, matapos ang pagsinapol kaupod si Land Transportation Franchising and Regulatory Board 6 Director Richard Osmeña kaupod ang transport groups sa syudad, ila nakita nga may yara sang overlapping nga mga ruta.
Ginpahayag ni Conlu nga may posibilidad nga madugangan pa ang mga ruta padulong sa Iloilo Business Park ukon Megaworld bangud nga ginapanan-aw nila nga magalab-ot sa 50,000 ang home owners samtang magalab-ot man sa 30,000 ang mga empleyado sa business process outsourcing companies nga yara sa nasambit nga area.
Sa masunod nga semana, may yara sang pagsinapol agud mahitso na ang nasambit nga mga ruta kag pagasundan sang experiment.
