ILOILO CITY– Ginapangayo sang Irrigators Association sang Janiuay, Iloilo nga mauntat na ang ginahimo nga quarry operation sa nasambit nga banwa.
Sa interview sang Bombo Radyo kay anay SB Member Noel Alerta, miyembro sang Irrigators Association sang Janiuay, Iloilo, iya ginpahayag nga madugay na nag-umpisa ang quarry operation apang tubtob subong, wala pa nasuguran ang proyekto nga farm to market road halin sa Brgy. Bongol tubtub sa Brgy. Quipot.
Suno kay Alerta, kaangay nga ginpatalang sila bangud sang pasalig nga para sa proyekto nga farm to market road ang ginkuha nga construction materials.
Indi nila mapahanugutan suno kay Alerta ang ginahingyo nga quarry operation sa ibabaw nga bahin bangud naguba kag tuman nga naakapektuhan ang irigasyon nga ginakuhaan sang tubig sang mga mangunguma.
Ginpahayag ni Atty. Arturo Cangrejo, pinuno sang Provincial Environment and Natural Resources Office, nga nagpadala na siya sang mensahe sa Local Government Unit sang Janiuay agud nga makakuha sang dugang nga impormasyon.
Suno kay Cangrejo, sa tion nga makumpirma ang reklamo nga ginpalab-ot ni Alerta, magapaguwa sang notice of violation kag cease and desist order ang Provincial Environment and Natural Resources Office agud mapauntat ang quarry operation.
Magapakig-angot ang natungdan kay Alerta kag magapatigayun man sang konsultasyon sa mga pumuluyo sa mga apektado nga barangay.
