ILOILO CITY – Nadugangan sang isa ang 45 ka mga barangay nga napaslawan sa ginpatigayon nga assessment sang Road Clearing Validation Team.
Sa interview sang Bombo Radyo kay Love Joy Hosenilla, pinuno sang Task Force on Anti-Squatting and Illegal Structures Unit iya ginpahayag nga sa 15 ka mga barangay nga ginlibot nila isa diri ang nakakuha sang manubo nga rating kag nalakip sa mga barangay nga napaslawan nga magtuman sa mandu sang Department of Interior and Local Government may kaangtanan sa pagpanghawan sang ila mga barangay.
Suno kay Hosenilla, kalabanan as problema sang nasambit nga barangay nga nangin rason sang ila pagkapaslaw amo ang mga salakyan nga naga illegal parking kag mga kahot nga ginpangtapas kag wala nahimos.
May kaangtanan diri, nagapati sila nga makapasar na ang mga napaslawan nga barangay sa syudad sang Iloilo sa patigayunon nga ika-duha nga hugnat sang validation bangud wala nagkulang ang DILG sa pagpahanumdom sa ila sang ila mga kakulangan nga kinahanglan nila pun-an agud ma kapasar na.
