CALINOG ILOILO– Nagdugay sang halos 10 ka minutos ang nagluntad nga engkwentro sa tunga sang 61st Infantry Batallion kag sang New Peoples Army sa Brgy. Binolosan Pequeño, Calinog, Iloilo.
Sa interview sang Bombo Radyo kay Lt. Col Joel Benedict Batara, commanding officer sang 61st infantry Batallion, iya ginpahayag nga nakabatun sila sang report nga may presensya sang mga rebelde sa nasambit nga lugar kag malapit pa sa isa nila ka detachment.
Suno kay Batara, magapatigayun kun tani sang tactical operation ang mga rebelde kasunod sang ila anibersaryo subong nga bulan.
Ginpahayag ni Batara nga ginabanta siyam ka miyembro sang Hingabon Platoon sang Komiteng Rehiyon Panay ang naka-engkwentro sang militar.
Wala naman sang napilasan sa bahin sang militar samtang posible nga may napilasan sa bahin sang mga rebelde bangud nga may nakita nga tinulo sang dugo sa encounter site.
Nakuha sang militar ang M79 nga armas kag may pito ka live ammunitions, tatlo ka riffle grenade, duha ka duyan, medical paraphernalia, canned goods kag mga dukomento.
