ILOILO CITY – Dako nga pamangkutanon para sa mga pumuluyo sang banwa sang Alimodian ang masami nga pagkasunog sang Agony Hill sa nasambit nga lugar.
Ini matapos nga liwat nga ginalamon sang kalayo ang nasambit nga lugar kagab-i nga nagsugod sa station 7.
Sa interview sang Bombo Radyo kay Engr. Reno Alquesada, iya ginpahayag nga naandan na nila nga kada tuig kag nagahilapit ang semana santa nagakasunog ang nasambit nga lugar sa pareho nga oras.
Suno kay Alquesada, nabutangan na nila sadto pa sang tawo ang nasambit nga lugar agud magbantay apang padayon man ini sa gihapon nga nagakasunog kada tuig.
Dugang sang natungdan, madamo sa ila mga pumuluyo ang nagapati nga isa ini ka milagro ukon makatilingala nga hitabo apang padayon sa gihapon nila nga gina tsekyar ang lugar agud masiguro kun bala hunggod ini nga gina sunog.
