ILOILO CITY – Nakahanda ang Iloilo City Government nga sundon ang rekomendasyon sang Inter-Agency Task Force may kaangtanan sa liwat nga pagpatuman sang weekend block off.
Sa interview sang Bombo Radyo kay Iloilo City Mayor Jerry Treñas, iya ginpahayag nga magapabilin ang exit plan apang nakadepende sa gihapon ang mangin pinal nga desisyon sa rekomendasyon sang Inter-Agency Task Force.
Suno kay Treñas, ginatan-aw pa niya kun bala mapatigayon liwat sang weekend block off matapos nga nangin madinalag-on ang pagpatuman sini sa una nga duha ka semana.
Kun ang Public Safety and Transportation Management Office naman ang pamangkuton, nangin epektibo ang pagpatigayon sang weekend block off sa syudad.
Sa interview sang Bombo Radyo kay Jeck Conlu, pinuno sang Public Safety and Transportatio Management Office, iya ginpahayag nga nakita niya nga nagsunod ang tanan sa diin kalabanan ang nagpabilin sa ila tagsa ka balay bangud sirado man ang mga balaklan.
Kun siya ang pamangkuton suno kay Conlu, nagapati siya nga nagakadapat nga palawigon pa ang weekend block off bangud nagasugod pa lang ang ginapatigayon nga mass testing kag ginahulat pa ang resulta sang iban nga tests.
Mas dapat nga kalabalak-an suno kay Conlu ang infection nga mahimo magluntad ilabi pa nga may magapauli nga mga Overseas Filipino Workers.
