ILOILO CITY – Ginakasubo sang Department of Social Welfare and Development ang nakalab-ot sa ila nga ginagamit sa tahor ang nabaton nga ayuda sa Social Amelioration Program.
Sa interview sang Bombo Radyo kay Department of Social Welfare and Development Assistant Secretary Rhea Peñaflor, iya ginpahayag nga masubo panumdumon nga mas gina-una pa sang mga benepisyaryo ang pagtahor sa baylo nga ibakal sang ila mga kinahanglanon.
Suno kay Peñaflor, base sa layi, posible nga magpangatubang sang nagakaigo nga silot ang mga nagkaladakpan bangud sa Illegal Gambling.
Sa subong, ginahulat na lang ang desisyon sang Inter-Agency Task Force kun bala hatagan pa sang second wave sang ayuda ang mga nauna na nga nagkaladakpan.
May kaangtanan naman sa mga nakabaton sang Social Amelioration Fund nga gilayon nga ginbawian, ginpahayag sang Department of Social Welfare and Developement nga kinahanglan nga ibalik gid ang kwarta.
Sa interview sang Bombo Radyo kay alyas Nene, isa sa mga benepisyaryo nga ginbawian sang ayuda, iya ginpahayag nga ginapasulat sila sang kasugtanan sang Municipal Social Welfare and Development Officer sa diin nakasaad nga kinahanglan nila bayaran kag ibalik ang ayuda nga ila nabaton pagkatapos sang Enhanced Community Quarantine.
Suno kay Nene, nakasaad man nga kinahanglan nila bayaran sang P500 kada semana kag mahimo nga ihatag nila ini sa Punong Barangay ukon sila mismo ang magabayad sa Municipal Social Welfare and Development Office.
Sa subong, nagalibog ang ulo ni Nene kag sang iban pa nga ginbawian man sang ayuda kun sa diin sila makuha sang inugbayad.
