STA. BARBARA ILOILO-Patay ang isa ka lalaki matapos nalumos sa suba sa barangay Lacadun Sta. Barbara Iloilo.
Ang biktima ang ginkilala nga si Alyas Ronnie, 34 anyos, residente sang barangay Bagumbayan sa nasambit nga banwa.
Sa interview sang Bombo Radyo kay Police Staff Sgt. John Derson Sabio, imbestigador sang Sta Barbara Municipal Police Station, iya ginpahayag nga nagpadulong sa balay sang iya tiyo sa Barangay Lacadun ang biktima bangud wla man ini sang ubrahon.
Suno kay Sabio, natulugan ang biktima kag sang nakabugtaw, gintimplahan pa ini sang kape sang iya tiyo apang naglisensya ini nga makadto sa suba, bangud nagahulat ang iya mga kaabyanan didto.
Pahayag pa sang imbestigador, gin-updan pa sang tiyo ang biktima kag sang pag-abot sa suba nga wala na didto ang iya mga abyan nagdesisyon ini nga magpaligo nalang.
Ginpunggan pa kuntani sang iya tiyo si Alyas Ronnie bangud madalum ang suba apang wala gid ini nagpapugong, nga nangin tunaan man sang iya pagkalumos.
Gintinguhaan pa kuntani nga madala sa hospital ang biktima ang gindeklara nga dead on arrival.
