MALACAÑANG– Nagapabilin nga neutral si Presidente Rodrigo Duterte, may kaangtanan sa isyu sa prangkisa sang ABS-CBN.
Suno kay Presidential Spokesperson Harry Roque, luyag sang Presidente nga ang mga kaalyado sini sa House of Representatives, ang ‘magboto santo sa ginadikta sang ila konsensya’ sa prangkisa sang nasambit nga tv network.
Pahayag pa ni Roque, wala sang kabalak-an ang mga mamalidha, bangud indi man mangakig, ukon malipay ang Presidente sa tion nga mapasar ang prangkisa sang ABS-CBN.
Nahibaluan nga kahapon nga adlaw, nagpagwa sang cease and desist order ang National Telecommunications Commission batok sa tv network bangud nag-expire na ang prangkisa sini.
Matandaan nga nagapabilin sa gihapon nga pending ang franchise application sa Kongreso.
