ILOILO CITY – Ginpaagi sang mga anak sa pagsulat sang binalaybay ang ila mensahe para sa tanan nga iloy subong nga Mother’s Day.
Sa Good Morning Philippines Program, ginpahayag ni KC Faith Gadnao, 18 anyos sang Nueva Valencia, Guimaras nga wala sang katupong ang inagyan sang tanan nga iloy humalin sa pagbusong, pagbun-ag tubtub sa pagpadako sa ila anak.
Suno kay Gadnao, ang iya binalaybay nga ‘Exceptional? Mga Nanay Nating Minamahal’ ang tuhoy sa kabudlay nga gin-agyan sang iya iloy nga nagbusong sa lanubo nga edad.
Apisar sang mga pagpanghangkat sa kabuhi, ginpahayag ni Gadnao nga wala ini nangin upang para sa iya iloy nga magiyahan sila nga tatlo ka mag-ulutod.
Ang tanan nga iloy suno kay Gadnao ang makabig nga exceptional ukon tumalagsahon bangud sa ila pinasahi nga mga pamaagi sa pagpadaku sa ila anak.
Paagi sa pagtuon sang maayo kag pagtahod, mapakita niya suno kay Gadnao ang iya pagpasalamat sa iya iloy.
Samtang, yari naman ang kabahin sang binalaybay ni KC Faith Gadnao para sa iya iloy:
Para naman sa 21 anyos nga si Jeceveth Suarez sang Brgy. Pasil, New Lucena, Iloilo, ang pagtuon sang maayo kag ang pagtapos sa pag-eskwela ang indi mabayluhan nga regalo para sa tanan nga ginikanan.
Bisan pigado ang pagpangabuhi suno kay Suarez, indi lang magkataka sa paghimakas bangud ang tanan ang may yara gid sang maayo nga balos.
Ang iya binalaybay nga may tig-ulo nga ‘Pagpasalamat Para Kay Nanay/Mama’ ang nagasentro sa pagpabutyag sang pagpasalamat sa tanan nga sakripisyo sang iya iloy.
Ang tanan nga kadalag-an nga iya naangkon subong suno kay Suarez ang ginahalad niya para sa iya ginikanan.
Samtang, yari naman ang binalaybay ni Jeceveth Suarez para sa iya iloy:
