SYDNEY AUSTRALIA– Nagsugod na balik sa ila tagsa ka mga buluthuan ang mga kabataan sa pila ka Austalian States matapos ang ginpatuman ga ‘extended break’ bangud sa Coronavirus disease 2019.
Ini bangud sa padayun nga pagnubo sang kaso sang virus sa nasambit nga pungsod.
Lakip sa mga kabataan nga nagbalik sa ila tagsa ka buluthuan amo ang mga kabataan gikan sa New South Wales kag Northern State of Queensland.
Suno sa gobyerno sang New South Wales, nagdeliver na sila sang linibo ka litor sang habon kag hand sanitizers sa mga eskwelahan lakip na ang mga personal protective equipment kag temperature monitors.
Pahayag pa sang gobyerno, pagabuhinan man ang ‘class size’ lakip na ang mga aktibidad agud malimitahan ang physical contact sang mga kabataan.
Samtang, ginpahayag naman ni NSW Premier Gladys Berejiklian nga isa ini ka dako nga bulig bangud sila mismo ang nakahibalo kun ano ka importante nga ang tagsa ka mga kabataan ang makatuon pinaagi sa face to face teaching.
Ang mga estudyante naman nga yara sa ila pinakaulihi nga tuig sang pagtuon suno kay Berejiklian, ang mahimo magpadulong sa ila klase tatlo ka beses sa isa ka semana.
