ILOILO CITY – Nagpasalig ang Iloilo City Government nga ginatinghuaan nila nga matapos sa Mayo 15 ang pagpanghatag sang ayuda sa idalom sang Social Amelioration Program sang Department of Social Welfare and Development.
Sa interview sang Bombo Radyo kay Iloilo City Mayor Jerry Treñas, iya ginpahayag ginatinghuaan na nila nga gilayon nga matapos ang pagpanghatag sang nasambit nga ayuda bangud naglapaw na ang syudad sa ginhatag nga deadline sang Department of Interior and Local Government kag sang Department of Social Welfare and Development.
Suno kay Treñas, tinghuaan nila nga antes ukon sa Mayo 15 mismo mapagwa na ang tanan nga payroll kag mapanagtag na ang ayuda sa mga benepesyaryo sang nasambit nga programa.
Kun madumduman, una na nga ginpagwa sang Department of Social Welfare and Development ang bag-o nga pagsulundan may kaangtanan sa miyembro sang roster family nga wala na naga tinir sa balay sang ila ginikanan nga active household beneficiary sang Social Amelioration Program ukon 4P’s.
Base sa ginpagwa nga pagsulundan sang Department of Social Welfare and Development, ginpahanugutan na ang mga yara sa household roster sang 4Ps beneficary apang may lima ka mga kondisyon agud ma qualify ang isa ka myembro.
(1) Nagakadapat nga indi na katapo sang 4Ps
(2) Nakaseparar na sa pamilya nga benipesyaryo sang 4Ps
(3) Indi na benipesyaryo ukon wala na nagabaton sang cash assistance sang 4Ps
(4) Duha na ka bulan nga separado sa pamilya nga katapo sang 4Ps
(5) Dapat ‘move out’ na ang status
Sa bahin sang move out status:
(1) Kinahanglan nga mapaidalom sa validation kag makapangayo sang certification sa Punong Barangay nga nakaseparar na sa pamilya nga miyembro 4Ps beneficiary
(2) Mismo ang grantee ang magahimo sang deklarasyon nga wala na naga-istar sa ila balay ang mangin benipesyaryo sang Social Amelioration Program
(3) Mismo ang Punong Barangay ang magapasa sang listahan sa Department of Social Welfare and Development.
