ILOILO CITY- Nagperma sang petisyon ang mga vendors sa Iloilo Terminal Market agud pahalinun ang ila Market-In-Charge, bangud sa indi maayo nga pagtrato sa ila.
Sa interview sang Bombo Radyo kay Alyas Jen, isa sa mga vendor sa Iloilo Terminal Market, iya ginpahayag nga wala sila nanami-an sang pamaagi sang pagtrato sa ila.
Suno kay Jen, may mga beses pa nga ginasinggitan, ukon ginataasan sila sang tingog sang Market-In-Charge nga si Maria Dolores Trabasas.
Pahayag pa niya, siya mismo personal ang napaagyan ni Trabasas sa diin, ginsinggitan siya mismo sa tunga sang madamo nga tawo sa sulod sang merkado.
Dugang pa niya, wala kuntani sang problema kag indi sila magreklamo kun maayo lang ang pagtrato sa ila ni Trabasas.
Ginpahayag man ni Manong Boy, isa man ka vendor sa Iloilo Terminal Market, nga kadamo na sang tion nga indi nagid maayo ang pagtrato sa ila ni Trabasas.
Suno kay Manong Boy, sa halos 30 anyos niya nga pagbaligya sa sulod sang nasambit nga merkado, wala siya nakasalapo sang market-in-charge-nga may batasan kaangay sang ginpakita ni Trabasas kag wala konsiderasyon sa iya isigkatawo.
Pahayag pa niya, kun maayo lang ang tyempo nagagwa kag naga-inspeksyon si Trabasas, apang kun naga-ulan wala man ini nagapanaog, agud sekyarun ang sitwasyon sang mga vendors.
Samtang, naghatag sang sabat ang Market-in-charge sang Iloilo Terminal Market tuhoy sa petisyon nga ginpermahan sang mga vendors.
Sa interview sang Bombo Radyo kay Maria Dolores Trabasas, iya ginpahayag nga natural lang niya nga boses ang ginagamit agud magpanaway sa mga vendors.
Suno kay Trabasas, wala pa niya nabatun ang kopya sang petition letter apang nakahibalo na siya sang ginhimo nga lihok sang mga tenants.
Pahayag pa sang natungdan, wala man siya sang may mahimo kun wala nagustuhan sang mga tenants sa terminal market ang iya pamaagi sa pagdisiplina, apang nagapangayo siya sang pasaylo kun may yara sang nagalain ang buot sa iya.
Nahibaluan nga nagahingyo ang mga vendors nga islan ang ila market-in-charge sang persona nga maka-intindi sa ila sitwasyon.
