ILOILO- Ginahitso na ang kaso nga ipasaka sa isa ka pulis kag isa ka civilian nga nadakpan nga nagpalusot sang 60 ka box sang ilimnon sa checkpoint sa Brgy. Nanga, Guimbal, Iloilo.
Ang pulis nga dakapan ang ginkilala nga si Police Staff Sergeant Jose Digcabo-on Jr., naka-assign sa Regional Personnel Holding and Accounting Unit sang Police Regional Office 6 samtang ang driver naman sang shuttle van ang ginkilala nga si Leo Faldas, 47 anyos sang Zone 4, Boulevard, Molo, Iloilo City.
Sa interview sang Bombo Radyo kay Police Lieutenant Nelson Caro, hepe sang Guimbal Municipal Police Station, iya ginpahayag nga si Digcabo-on ang nag-obstruct sa trabaho sang mga pulis nga yara sa checkpoint.
Ini bangud nga nagpalapit si Digcabo-on sa mga pulis nga nagabantay sa checkpoint agud punggan ang pagbukas sang salakyan.
Suno kay Caro, santo sa alegasyon sang driver nga si Faldas, ginapanag-iyahan ni Digcabo-on ang kinarton nga ilimnon nga yara sa sulod sang shuttle van.
Posible man suno kay Caro nga gin-arkilahan lang ang salakyan agud kargahan sang ilimnon.
Matandaan nga apisar yara na sa General Community Quarantine ang probinsya sang Iloilo, epektibo sa gihapon ang liquor ban.
