ILOILO CITY– Nagapangabay si Iloilo Governor Arthur Defensor Jr. nga kun tani indi pag gulpihon ang repatriation sang Overseas Filipino Workers.
Ini matapos nga sunod-sunod na ang pag-inabot sang Overseas Filipino Workers matapos ang mandu ni Presidente Rodrigo Duterte nga kinahanglan makapauli ang halos 24,000 nga OFWs sa sulod sang isa ka semana.
Sa interview sang Bombo Radyo kay Defensor, iya ginpahayag nga kinahanglan mangin maayo ang koordinasyon sang tagsa ka Local Government Unit agud nga wala sang problema sa pag-abot, pagsugat kag akomodasyon sang OFWs.
Sa iya bahin suno kay Defensor, ginkakibot niya nga madamo ang magapauli subong nga adlaw, Mayo 25, bangud nga ulihi na lang siya ginpahibalo.
Kun gulpihanay ang pagpauli sang repatriates suno sa gobernador, makompromiso ang ginapatuman nga protocol sa bug-os nga probinsya.
Ginpasigurado naman sang natungdan nga maayo ang koordinasyon sang Iloilo Provincial Government kag Inter-Agency Task Force para sa smooth-sailing nga repatriation.
