ILOILO CITY – Madamo sang mahapos, affordable apang manamit nga pagkaon nga mahimo lutu-on subong nga quarantine period.
Lakip sa mga ginpatpat sa Good Morning Philippines program ni Christine Perez, tag-iya sang Dad’s 60’s Diner sa Plazuela de Iloilo, amo ang COVID drink, Pandan Chicken, Sisig kag 3-flavoured rice.
Sa paghimu sang thirst-quenching drink, kinahanglan ang mga masunod:
-Duga sang 10-12 ka bilog calamansi, ginhiwa nga lemon kag cucumber, tinuktok nga luy-a, kalamay kag tubig
I-mix ang tanan nga ingredients sa pitsel ukon baso kag i-adjust ang katam-ison paagi sa pagbutang sang kalamay kag mahimo man ini nga butangan sang ice.
Sa Pandan chicken, kinahanglan ang breast ukon thigh part, gata, luy-a, patis, asin, sili kag pandan leaves.
Sa pag-marinate sang manok, isamo ang gata, luy-a, patis, asin, sili kag putson sang pandan leaves ang manok antes lutuon gamit ang marinade sauce.
Kun luto na, mahimo na ini nga prituhon sa sulod sang pila ka minuto tubtub nga maluto.
Para naman sa Sisig, kinahanglan ang isa ka kilo nga pork belly, asin, bell pepper, bombay, sili, calamansi, mayonnaise kag cooking oil.
Una nga step amo ang paglaga sang pork belly, butangan sang asin, hulaton nga maluto antes ang pag deep-fry sini kag tuktukon sang pino.
Ang gintuktok nga pork belly ang igisa kaupod sa bell pepper, bombay, sili kag i-mix tubtub nga maluto samtang magaserbe naman nga toppings ang calamansi kag ang mayonnaise.
Agud nga wala sang uyang, ang left-over Sisig ang mahimo lutuon bilang Sisig rice.
Sa pagluto, gisahon sa mantika ang nabilin nga Sisig, kan-on, ahos, white onion kag mahimo man nga butangan sang itlog para mas saboroso.
I-mix ang nasambit nga ingredients tubtub maluto kag magluwas sa Sisig rice, lakip man sa recipe nga mahimo gamit ang kan-on amo ang Atsuete Bagoong
rice kag ang Chili Rice.
