NEW YORK- Naalarma ang mga taga New York bangud sa padayun nga hublag protesta kadugangan sang panawagan sang hustisya para sa kamatayon sang black american nga si George Floyd.
Suno kay Bombo International Correspondent Alex Vidal, nagapadayun ang serye sang hublag protesta sa sulod sang anum ka adlaw kag luyag sang mga raliyista nga dakpon ang iban pa nga mga pulis nga naulamid sa kamatayon sang biktima.
Suno kay Vidal, masobra sa 300 ka mga raliyista lakip na ang anak ni New York Mayor Bill de Blasio nga si Chia De Blasio ang gindakop sang otoridad.
Nangin bayolente na ang pagpatigayon sang protesta kun sa diin may nagapanghaboy na sang bato, ginasunog ang mga patrol cars kag ginasulod ang mga commercial establishment.
Ginpahayag ni Vidal nga may yara naman sang mga pulis nga nagkalamatay kag nagkalapilasan sa sunod-sunod nga protesta.
Nag-abot man sa punto suno kay Vidal nga ginpapanago si US President Donald kaupod ang iya anak bangud nakalab-ot na sa White House ang mga raliyista.
Sa subong suno sa natungdan, ginabantayan sang maayo si Derek Chauvin, ang police officer nga nagpatay kag George Floyd.
