JORDAN, GUIMARAS– Hugot nga ginapatuman sang pamunuan sang Jordan Public Market sa Guimaras, ang mga health protocols para sa mga nagasulod nga mga pumuluyo sa merkado,agud magpamalaklon.
Sa interview sang Bombo Radyo kay Rena Dela Cruz, clerk sa Jordan Terminal Market, iya ginpahayag nga strikto ang mga protocols nga ila ginapatuman, agud masigurado ang ikaayong lawas sang tagsa-tagsa.
Suno kay Dela Cruz, kinahanglan may yara sang face masks sa tion nga magsulod sa merkado, mag-obserba kag sundon ang physical distancing, kag may yara man sila sang alcohol ukon disinfectant station antes magsulod.
Ginabawalan man suno sa iya ang mga kabataan nga below 21 anyos kag ang mga tigulang nga 60 anyos pataas, agud maprotektahan ang ila ikaayong lawas.
Magluwas diri suno kay Dela Cruz, kun madamo ang nagasulod sa merkado, 50 lang ang ila ginapahanugutan nga makasulod, samtang ang iba naman ang magahulat lang sagwa sang merkado, agud indi magginutok.
Dugang pa sang natungdan, may yara sang mga uniformed personnels nga nagabantay sa merkado, lakip na ang iban pa nga katapo sang Task Force sa Guimaras.
