ILOILO CITY– Ginatan-aw sang Regional Anti-Cyber Crime Unit sang Philippine National Police ang posibilidad nga politically motivated ang pagdamo sang fake ukon dummy accounts sa Facebook.
Sa interview sang Bombo Radyo kay Patrolman Emerito Frutas Jr., Spokesperson sang Regional Anti-Cyber Crime Unit 6, iya ginpahayag nga may yara gid sang persona nga amo ang sa likod sang paghimo sang fake accounts kag posible man nga may yara sang software nga ginagamit.
Suno kay Frutas, ang iban sa mga ginpanghimuan sang peke nga account amo nga may yara sang gin share nga content nga may #junkterrorbill kag nakadepende ini sa kadamuon sang gin share nga post.
Posible suno kay Frutas nga may kaangtanan sa kontrobersyal nga Anti-Terrorism bill ang paglinapta sang peke nga account.
Bilang sabat sa nasambit nga problema, nagapatigayon sang information dissemination ang Philippine National Police kun paano madula ang peke nga account sa Facebook lakip na diri ang pag report kag kun mahimo, i-private ang social media account.
Sa subong suno kay Frutas, may ginahimo na nga lihok ang Facebook Philippines angot diri.
Nahibaluan nga posible magpangatubang sang kaso nga may kaangtanan sa Identity Theft, Unjust Vexation ukon paglapas sa Safe Spaces Act ang sin-o man nga mapamatud-an nga nagahimo sang fake ukon dummy accounts.
