ILOILO – ‘We fight as one’.
Ini ang mensahe ni Iloilo Gov. Arthur Defensor Jr. may kaangtanan sa ika-122 nga Independence Day celebration subong nga adlaw, Hunyo 12.
Sa interview sang Bombo Radyo kay Defensor, iya ginpahayag nga kinahanglan nga magbuligay ang tanan agud nga malab-ot ang kahilwayan ilabi na sa makamamatay nga virus nga naga-apekto sa bug-os nga kalibutan.
Suno kay Defensor, ang pagpakig-away sang tanan nga baganihan sang Pilipinas para sa kahilwayan ang kasubong man sa pagpakig-away sang frontliners sa COVID-19.
GInpahayag ni Defensor nga isa siya sa magatambong sa flag raising kag wreath laying sa banwa sang Sta. Barbara kun sa diin makita ang pinakadaku nga hayahay kag ginakabig nga Cradle of the Philippine Revolution outside Luzon.
Indi naman makatambong sa selebrasyon si Mayor Rema Somo sang Sta. Barbara, Iloilo bangud nga wala pa natapos ang iya 14-day quarantine.
Suno kay Somo, nagdesisyon siya nga magpaidalom sa quarantine matapos naka-angkon sang close contact kay Mayor James Esmeralda sang Igbaras, Iloilo nga may yara man sang direct contact sa isa ka COVID-19 patient sa nasambit nga banwa.
Ginpahayag ni Somo nga ang magtal-os sa iya amo ang Bise Alkalde kag ang mga SB Members kaupod ang pila ka mga opisyal sa probinsya sang Iloilo kun sa diin ang flag raising ceremony ang maga-umpisa 8:00 sang aga.
Bangud sa ginapatuman ng health protocols, limitado lang ang magatambong sa nasambit nga selebrasyon kun sa diin wala na sang programa nga patigayunon pagkatapos sang wreath laying sa rebulto nanday Dr. Jose Rizal kag Gen. Martin Delgado.
