ILOILO CITY- Nagakasubo ang National Union of Journalist of the Philippines sa guilty verdict batok sa Chief Executive Officer sang Rappler nga si Maria Ressa.
Sa interview sang Bombo Radyo kay Nonoy Espina, Chairman sang National Union of Journalist of the Philippines, iya ginpahayag nga padayon ang trabaho sang media sa pagpahibalo sa pumuluyo kun bala husto ang ginahimo sang gobyerno.
Suno kay Espina, makahaladlok ang desisyon indi lamang para sa mga mamamahayag kundi para sa pumuluyo bangud tanan ang apektado ilabi na ang nagagamit sang social media bangud ginhimo nga 12 ka tuig ang prescription sang cyber libel.
Apektado kag natandog suno kay Espina ang kinamatarong sang tagsa ka indibidlwal nga magpahayag sang sentimento bangud sa kaso nga posible ipasaka.
Ang pumuluyo na mismo suno sa natungdan ang makadesisyon kun bala pasugtan nga pahipuson kag indi mahatagan sang kahigayunan nga magpalayag sang sentimento batok sa gobyerno.
