ILOILO CITY– Emosyonal nga ginpakigbahin sang isa ka amay subong nga Father’s Day ang iya mga inagyan sa kabuhi, agud tungdan ang iya responsibilidad bilang amay kag iloy sa iya duha ka anak.
Sa Good Morning Philippines Program, ginpahayag ni Georey Bucana, isa ka amay, kag fitness instructor nga indi mahapos ang iya inagyan sa kabuhi matapos nagtaliwan ang iya tiayon.
Suno kay Bucana,napatay ang iya 39 anyos nga tiayon Setyembre 2019 matapos nagbun-ag sang ila ikaduha nga anak.
Kumplikado suno sa iya ang pagbusong sang iya tiayon bangud na-detect sa ultrasound nga nagasuprer ini sang placenta previa, kag masami naga-bleeding.
Matapos nagbun-ag sang ila anak, nagdesisyon ang mga doktor nga kuhaon nalang ang matres sini bangud indi mag-untat ang bleeding sini, apang sa malain nga palad samtang ginasirado na ang pilas sini matapos ang ginpatigayun nga procedure nagnubo ang blood pressure sini lakip na ang heart rate.
Sa amo sadto nga tion, wala siya nakahibalo kun ano ang iya mangin reaksyon kag himuon, apang ginpilit niya nga magpakabakod para sa iya mga kabataan.
Nakabulig suno sa iya suno kay Bucana nga may yara siya sang mga aktibidad nga ginahimo agud magmag-an ang iya balatyagon.
Bilang isa ka amay nga nagatrabaho nangin dako ang papel sang multi tasking kag time management agud matungdan niya ang tanan nga responsibilidad.
Subong nga Father’s Day nagpalab-ot man siya sang mensahe sa iban pa nga mga amay nga palanggaon ang ila tagsa ka mga tiayon.
Suno kay Bucana, mabudlay kun madulaan sang tiayon nga mahimo makabulig sa pagpangabuhi gani nagakadapat lang nga palanggaon sang tagsa ka mga bana ang ila tiayon
Samtang, nagpalab-ot sang himpit nga pagtamyaw sa iya amay ang anak sang isa ka fitness instructor subong nga Father’s Day.
Sa Good Morning Philippines Program, ginpakigbahin ni Georgia kaupod sang iya utod nga si Mira, ang ila mensahe sa amay nila nga si Georey Bucana.
Suno kay Georgia, palangga niya katama ang iya amay.
Pahayag pa niya, kuntani magpakabakod lang ini kag permi nga maghalong sa iya trabaho kag kun sa diin man ini nagapadulong.
Samtang, nagpalab-ot man sang mensahe sang pagtamyaw ang iloy ni Georey subong nga espesyal nga adlaw para sa mga amay.
Suno sa iloy sini nga si Reynalda Bucana, padayunon lang sini ang pagserbe bilang maayo nga amay sa iya duha ka kabataan.
Ginapangabay sang natungdan nga kuntani, indi sini pagkalimtan ang mga maayo nga gintudlo sang iya amay sa iya.
Gina-ayo man sini nga kuntani hatagan sang Ginoo sang maayo nga bugay sa ikaayong lawas ang anak nga si Georey.
