ILOILO CITY – Ginpasalig sang AC Energy nga indi magpabaya sa ila katungdanan sa mga apektado nga residente matapos nagluntad ang oil spill sang naglupok ang ila power barge sa Bo.Obrero, Lapuz, Iloilo City.
Sa interview sang Bombo Radyo kay Mr. Gabino Ramon Mejia, pinuno sang Plant Operations sang Ayala Company na AC Energy iya ginpahayag nga santo sa ila pag usisa, nagadangat sa masobra 300 ka pamilya ang apektado sang oil spill.
Suno ay Mejia, naka istorya na sila ni Iloilo City Mayor Jerry Treñas kag nakasugtan nga doblehon ang ila ginahimo nga tikang agud indi mahul-an ang mga residente sang syudad.
Ginpahayag sang natungdan nga sila man ang mabakal sang mga kinahanglanon sa pagpaninlo sa mga coastal areas kag paghatag sang pagkaon kag hiligdaan sang mga evacuees.
Nagpasalamat man si Mejia sa Iloilo City Government sa paghatag sang 10 ka mga nurses sa diin ang AC Energy naman ang magapangita sang 10 man ka mga doktor nga maga-atender sa kinahanglanon sang mga evacuees.
Gin-athag man ni Mejia nga makabaton man sang kompensasyon ang mga residente sang Guimaras nga naapektuhan sang oil spill.
