ILOILO CITY – Nagapahuway lang sa iya balay si Iloilo City Mayor Jerry Treñas.
Ini bilang kabahin sang iya 14 day quarantine period matapos na exposed sa empleyado sang AC Energy nga nagpositibo sa Coronavirus disease 2019 (COVID-19).
Sa exclusive interview sang Bombo Radyo kay Treñas, iya ginpahayag nga nagdesisyon siya nga magpa-quarantine matapos wala sila nagpatuman sang physical distancing matapos nagpa picture sa iya ang isa ka mga COVID-19 positive sang nagdonar ang mga ini sang Personal Protective Equipment (PPE) kag facemask.
Suno kay Treñas, ang iya temperatura ang 36.4 degree celsius, normal ang oxygenation kag wala sang anuman nga ginabatyag sa lawas.
Gin-athag man sang alkalde nga padayon sa gihapon ang iya trabaho bilang alkalde apisar naka home quarantine.
Sa maabot nga dominggo, mapaidalom sa Reverse transcription polymerase chain reaction (RT-PCR) test ang alkalde kag ginalauman nga magwa ang resulta sa martes.
