ILOILO – Nagpaathag si Department of Health Region (DOH) VI Director Dr. Marlyn Convocar sa DOH Central Office nga kinahanglanon man sang Western Visayas ang mga doktor kag nurse.
Ini ang kasunod sang memorandum ni DOH Assistant Secretary Roy Ferrer, pinuno sang Field Implementation and Coordination Team sang Visayas kag Mindanao, nga nagapanawagan sa mga licensed physicians kag nurse nga magbulig sa mga “danger zones” sa Pilipinas nga may mataas nga kaso sang COVID-19.
Ini nga danger zones ang ginalakipan sang National Capital Region (NCR), Region 3, kag Region IV-A.
Sa interview sang Bombo Radyo kay Convocar, iya ginpahayag nga mataas man ang kaso sang COVID-19 sa Rehiyon 6 kag sa pagkamatuod, nagapang-anum ukon nagapang-pito sa may pinakamataas nga COVID-19 cases sa bug-os nga Pilipinas.
Suno kay Convocar, kun naga-solicit ang NCR sang mga medical health workers, ang nagapanguna nga i-tap nila amo man ang yara sa neighboring ukon kaiping nga mga rehiyon.
Apisar sini, nagpahayag si Convocar nga bukas ang talatapan sa mga healthcare workers sa Rehiyon 6 nga boluntaryo nga magapa-deploy sa danger zones.
May yara sang pre-deployment orientation kag capacity building, kompleto nga PPEs, full board kag lodging, full payment sang traveling expenses halin sa point of origin tubtob sa point of destination kag vice versa, monitoring sang health status kag condition, 14 day working schedule deployment, kag mandatory quarantine period pagkatapos sang deployment nga may dala nga bayad.
